很無言
【做個清醒港人，少睇連登高登】
公立醫護人員好少會係醫院以外嘅地方舉行示威或遊行，無論係任何一個國家，公立醫護人員公開參與遊行，都唔係一件小事。好啦，香港政府焦公立醫院嘅土，迫到前線醫護人員行出呢一步，但有一班來自連登及高登討論區嘅「智者」，卻對護士講盡奚落及嘲諷嘅說話。
係網上世界，呢班智者經常擺出一副智慧高人一等嘅姿態，總之世事好似晨早比佢哋睇穿睇透。佢哋表面上邏輯思辨能力好似好高，但實際上十之八九都係功利主義，誅心論及陰謀論，即係先將所有事物抹黑或潑污水，然後望住一個黑漆漆，污穢不堪嘅畫面再作分析。如果你靠連登或高登嘅論述作為對世事萬物嘅參考，你好快會變成大陸五毛。
係芸芸工種裡面，前線醫護人員及消防員須要背負嘅道德責任係最大（註）。係香港，前者要面對愈來愈多嘅患者，道德及工作壓力愈來愈大。香港同鄰近強國嘅接觸及交流又愈來愈密，吸嘅空氣，飲嘅食水與及食嘅雞肉豬肉都受佢哋影響，港人健康出問題嘅機率只會愈來愈高。好話唔好聽，係可見嘅將來，我入住公立醫院嘅時間係愈推愈前。
無錯前線醫護人員嘅人工唔低，但作為站係拯救生命最前線，與及直接面對傷病及死亡嘅人，佢哋同消防員一樣，都係值得賺取高薪酬。救人係專業知識，除咗佢哋之外，我條命就唔會有人救到，我亦唔會隨便將我條命交託比其他人，所以我一定企係前線醫護人員個邊。
香港人眼中只有錢，世事萬物都用價值及價格去睇，我偏偏最憎呢種金錢至上論。如果護士要求加薪至10萬一個月嘅話，我嘅答案好簡單：take it and help me，please。但而家前線護士要加薪至10萬一個月嗎？唔係，但係網上呢班智者眼中，有人高薪過自己，呢個人就應該被批鬥。
係呢班智者眼中，分析任何事情嘅前設都大同小異，就係呢個社會應該同自己一樣咁自卑及失敗，如果唔係嘅話，就係社會嘅問題，而唔係自己。係呢班智者眼中，香港前線醫護人員係貪錢怪，係大懶蟲，要被批鬥，但我想講：佢哋跟本身在福中不知福。當佢哋係大陸住過醫，見過上面嘅前線醫護人員係點，就會意識到香港醫護人員嘅水平。
最後做個呼籲：做個清醒港人，少睇連登高登。
註：警察只會諗點樣偷拍裙底與及幾時入安全屋同二奶搞嘢，最大負任極其量係買安全套，所以不包括在內
Search